Ordonnantie ende placcaet
Ons ghenaedichs Heeren des Conincx /
Teghens die Vrybuyters / Knevelaers / ende Straetschenders
Met verbot op het logeren vande selve aende Her-
berghiers / Cabarettiers / ende allen
anderen persoonen.
Tot Bruessel /
By Rutgheert Velpius ghesworen boecdrucker der Con. Ma.
woonende by het Hoff / Inden Gulden Arent.
M. D. LXXXVI.
Met privilegie van sess Jaeren
Vanden Houte.
ONSEN Meyer van Loven / Amptman van Bruessel
Schoutetten van Antwerpen / ende van Shertogenbossche /
ende allen anderen onsen / ende onser Vasallen
ende Smaelreheeren / Rechteren / Justicieren ende Officieren
van desen onsen Lande ende Hertochdomme
van Brabant / ende van Overmaze / oft heure Stedehouderen / ende
elcken bysondere Saluyt. Alsoo tonser kennisse ghecomen is / dat
die Vrijbuyters / Knevelaers / Straetschenders ende andere onse vijanden
ende rebellen hun daegelijckx meer ende meer verstouten / die
goede Luyden / zoo wel Geestelijke als weirlijcke achter lande reysende
ende passerende / aen te tasten / ende gevangen wech te leyden / in
steden ende plaetsen houdende partije tegen ons / doende den selven
aldaer aene alderleye persingen / pijnen en tormenten / om van hun
te crijgen groote sware rantsoenen / dicwils meer bedragende dan
alle tgene sy inder werelt zyn hebbende / toecomende principaelijc
deur dien dat die Dorpluyden / ende andere ten platten lande gheseten /
egeene wachte sdaechs noch snachts en houden / maer laeten
die voors vrijbuyters / straetschenders ende knevelaers aldaer gerustelijck
passeren / sonder hun eenichsins tegen de selve te stellen /
al zyn zy daertoe sterck ghenoech. Waromme zoo eest dat wij
willende int gene des voors es versien / Ordineren ende bevelen wel
ernstelijcken bij desen / aen alle Baillieus / Schoutten / Meyers /
Vorsters / ende andere onse ende onser Vassallen ende Smalle heeren
Officiers ende Justiciers / dat zy voortaen in allen Dorpen doen houden
goede wachte sdaechs ende snachts / ende neirstige toesicht dragen
dat die behoirlijck ende met goede ordre geschiede / doende die wegen
daermen passeren moet / toesluyten met baillyboomen / om die persoonen /
die daer sullen willen passeren / ierst te mogen ondervragen /
ende weten / oft zy vrinden zyn oft vijanden. Ende soo wanneer zy
bevinden sullen eenige hun suspect wesende / van te zyn vrijbuyters
knevelaers ofte straetschenders / sullen de selve vangen indien zy
kunnen / ende ingevalle neen / alarme slaen / die clocke luyden / oft
andere teeckenen doen om die Dorpluyden te vergaderen / ende hun
te verstercken / ende alsoo by ghemeyne hulpe die voors. vrijbuters /
knevelaers ende straetschenders vangen: Ende soo verre de selve eenige
gevangene persoonen oft bueten by hun hebben / di hun afnemen.
Ende indien zy alnoch daertoe niet sterck genoech en souden wesen
sullen gehouden zyn in alle neirsticheyt daeraff tadverteren den Goeverneur /
ende Officier vande naeste stadt / mitsgaders onsen Drossaert
van Brabant / oft hunnen Lieutenant / Den welcken wij wel
ernstelijck midts desen ordineren ende bevelen / den voors. Dorpen terstont
ende sonder dilay oft uitstel alle assistentie / onderstant en behulp te
doen / zoo van hunne persoonen / als van hunne Borgeren / Sergeanten /
dienaers ende volcke. Ende opdat een yegelijk tot tgene voors.
is / bat ghemoit mach zyn / soo willen wij / dat onse voirgaende placcaeten /
waerbij wij eenen yegelycken hebben toegelaeten / die voirs.
vrijbuters / knevelaers ende straetschenders / opder plaetsen vrijelyc
doot te slaen / alnoch sullen plaetse hebben / sonder dat yemant ter
saeken van dien / in zynen persoone oft goeden nu oft hiernaemaels
sal worden belast / beswaert / oft ondersocht in eeniger manieren.
Insgelijcx willen wij oock dat onse voorgaende Placcaten gepubliceert
tegen die gene die de voors. vrijbuyters ontfangen / herbergen
oft anderssins in eeniger manieren assisteren / sullen wel scherpelijck
worden onderhouden. Ende die gene die sulx bevonden worden
gedaen te hebben / gestraft metter doot sonder dissimulatie / ende
daerenboven hunne huysen geruineert / ende te niette gedaen / tot
meerdere vreese ende exemple van andere. Ende want wij tot
dijen bevinden / dat onse voorgaende Placcaet / waerbij wij eenen
yegelycken hebben verboden eenige tavernen / herbergen oft caboretten
buyten in die Dorpen / oft ten platten lande te houden / dan
ten waere bij voirgaende scriftelyck consent / ende oirlof vanden
Officier vander naester stadt / niet en is tot nochtoe onderhouden /
noch gheachtervolcht geweest soo dat behoirde / by gebreke vanden
Officiers / die daer inne egeen genoechsaem debvoir en hebben gedaen /
waeraf wy ons zeer qualijck te vreden houden / Soo eest dat
wij willende hier inne naerder versien / Ordineren ende bevelen anderwaers
wel scherpelijck aen alle Prevoosten / Drossaerden ende
Officiers zoo vanden steden als vanden dorpen / ons oft onsen Vassallen
toebehoorende / dat zij / ende elck van hun / vortaen hun in tgene des
voorschreven is / behoirlijck quijten. Willende dat ten respecte vanden
straffe ende penen bijden voors. onsen voorgaende Placcate gestatueert
tegen den genen die den selven souden contravenieren / tusschen die
voors. Prevoosten / Drossaerden / ende Officiers / preventie sal plaetse
hebben. Ende daerenboven zoo ordineren ende bevelen wij den
selven / dat zy van stondenaene / naer de publicatie van desen sullen
hebben te verbieden alle herbergen / uitspanningen / en caboretten
gestaen ende ghehouden ten platten lande / buyten die principaele
dorpen ende plaetsen / op eenige cruysstraten / honken / en uitslagen
vande bosschen oft anderssints buyten sweechs / als wesende oprechte
receptaclen / nesten en schuylplaetsen vande voors. vrijbuters / straetscheynders
ende knevelaers / alwaer zy onder tdexsele ende naem
van vrienden hun comen vermaeken / en daernae gaen hunne quade
aenslagen volbrengen / en die goede luydens aentasten / en met hunnen
buyt de selve gevangen wech leyden tot in steden en plaetsen
by onse vyanden geoccupeert. Ende dit al op de pene / indijen die
voors. officiers / oft iemant van hun / in dexecutie van tgene des voors.
is / voirder ghebreckelijck vallen / tegen die selve by onse Fiscalen zal
worden geprocedeert / tot exemplaren straff ende correctie / als faulteurs
ende complicen van sulcke quaetdoenders ende delinquanten
sonder eenige dissimulatie / ende dat tot dien hunne offitien sullen
wesen impetrabel. Ende op dat niemant hieraff ignorantie en
pretendere / zoo ordineren wij / dat dese tegenwoordighe overal sal
worden gepubliceert / daermen gewoon is van onsen weghen uitroepinge
ende publicatie te doen / ende des niet en laet / Want onse
geliefte sulcx is. Gegeven binnen onser stadt van Bruessele onder
onsen Contrezegel op gedruckt den VI. Novembris
Bijden Coninck
In zijnen Raede
Lombaerts.