Instructie
Opt heffen vanden Im-
post vande vier stuyvers op elcke
Ame biers, by den Staten van Brabant
gheconsenteert, om te becostighen de sa-
ken vande amonitien ende wapenen tot-
ter oorlogen dienende.
Antwerpen by Christoffel Plantijn.
M. D. LXXXIII.
Instructie opt heffen vanden impost
vande vier stuyvers op elcke Ame biers by
den Staten van Brabant gheconsenteert, om te
becostighen de saken vande amonitien ende
wapenen totter orloghe dienende.
INden eersten van alle bieren binnen
Brabandt ghebrouwen die vercocht
sullen worden by den Brouwer / twelf stuyvers /
ende daer over / sal de selve brouwer
schuldich zijn te betalen van elcke Ame
biers vier stuyvers / om te becostighen de saken van
de amonitien totter oorloghe dienende.
Ende van ghelijcken van alle bieren in Brabant
niet ghebrouwen / weerdt zijnde twelf stuyvers d'Ame /
ende daer over / salmen oock schuldich zijn te betalen
die voorsz vier stuyvers van elcke ame Antwerpsche
mate / tot behoeff vande voorsz amonitie / by den ghenen
die de selve bieren in Brabant brenghen / vercoopen
oft leveren sullen.
Item dat den voorsz Impost inde Steden / Vryheden
ende Dorpen in Brabant / daer den selven niet en
sal verpacht worden / sal ontfanghen ende ghecollecteert
worden by den Pachters oft Collecteurs vande
Accysen / oft andere byden Wethouderen vande selve
steden / vryheden ende dorpen in Brabant / voor die
bequaemste ende best ghequalificeerde daer toe te stellen /
midts nemende vande selve al sulcke versekeringhe /
als oft sy selve onder eedt van ghetrouwicheyt
daer vooren wilde Borge blyven.
Alle wethouders van steden / vryheden ende dorpen
daer den selven Impost niet en wordt verpacht /
sullen ghehouden zijn over te senden in handen vanden
Rentmeester vanden quartiere daer onder sy resorteren /
acht daghen naer de publicatie van desen / de
namen vande Collecteurs die sy sullen respective ghecommitteert
hebben tot den ontfanck ende collectatie
vanden selven Impost: Ende op plaetsen daer gheen
Brouwers en woonen ende niet gebrouwen en wordt /
sullen de voorsz Wethouders aenden voorsz Rentmeestere
heurlieder certificatie senden.
Item dat aenden Pachter oft Collecteur een yegelick
tzy Brouwer van sijnen ambachte / oft brouwende
voor sijn selfs ghebruyck / ende oock alle de ghene
die bieren in Brabant niet ghebrouwen / in Brabant
brenghen / vercoopen ende leveren / sullen ghehouden
zijn over te brenghen t'getal vande Amen oft tonnen
biers die hy sal gebrouwen oft doen brouwen hebben /
ende die hy in Brabant brenght / vercoopt ende levert /
ende te betalen die voorsz vier stuvers van yeghelijcke
tonne oft Ame / eer hy die sal leveren / uitgeven
oft inden kelder doen. Op de verbeurte van tselve bier
met die tonnen / te deylen d’een derdendeel tot profijte
vanden Officier oft Deurweerder / die d'executie doen
sal / d'ander derdendeel tot proffijte vanden aenbrengher /
ende t'derde derdendeel tot proffijte vanden Staten
van Brabant ende ghemeyne sake / ende daerenboven
noch schuldich zijn t'voorsz recht te betalen.
Item dat alle bieren comende in Brabant van d'een
stade / vryheyt oft dorp in d'andere / sullen den selven
Impost betalen als de selfde bieren in d'andere stadt /
vryheyt oft dorp in Brabant ghebrocht worden: ten
waere dat de ghene die de selve bieren sullen brengen /
behoorlijcke certificatie mede brochten / dat den selven
Impost eens is betaelt gheweest by de Brouwers /
ter plaetse daer de selve bieren in Brabant gebrouwen
zijn: oft aengaende den bieren buyten Brabant
ghebrouwen / dat den selven Impost eens is betaelt
gheweest / by den innebrengher ter plaetse daer
de selve bieren eerst in Brabant ghebrocht / vercocht
oft ghelevert zijn gheweest.
Van alle de vremde bieren diemen van over Zee
brenght in Brabant / sal oock den voorseyden Impost
betaelt worden / weder die in Brabant vercocht
ende ghesleten worden oft daer uit ghelevert / ende dat
ter plaetse daer de selve bieren sullen ghecomen zijn.
Wel verstaende dat den selven Impost eens in een
plaetse in Brabant betaelt zijnde / dat sulcke bieren
sullen naederhandt in alle anderen steden / vryheden /
dorpen ende plaetsen in Brabant vry ende vranck zijn
vanden selven Impost / brenghende daer af behoorlicke
certificatie als voore.
Item dat alle de ghene die eenich bier sullen begheren /
tzy dat ghebrouwen zy ter plaetsen daer sy
woonen / of elders / voor hen eyghen gebruyck oft om
te vercoopen / en sullen dat niet moghen inden kelder
legghen sonder daeraff de wete te doen aenden Pachter
oft Collecteur / respectivelick een yeghelick in sijn
quartier / ende t'voorsz recht van Impost van vier
stuyvers te betalen / op de pene hier vooren verhaelt /
Ten waer dat hy het recht by den Brouwers oft andere /
oft oock op andere plaetsen in Brabant van daer
de selve ghebrocht zyn / betaelt hadde / ende dat hy het
met een briefken vanden Pachter oft Collecteur onderteeckent
dede blycken de welcke sal gehouden zijn
tselve te geven sonder cost van den ghenen diet betaelt.
Ende van dit recht en sal niemandt / van wat qualiteyt
hy zy / vry zijn / maer sal ghehouden zijn hem selven
te purgeren / ende dat doende sullen alle Brouwers
ende oock innebrengers van buyten bieren respectivelijck
schuldich zijn heuren eedt te doen in handen
vanden Pachters oft Collecteurs t'allen tijden des
versocht zijnde / ende met de oprechte waerheyt te verclaren /
ende verclaert te hebben die quantiteyt vande tonnen
ende amen biers / by hen t'elcken weken ghebrouwen
oft doen brouwen / oft in Brabant gebrocht
te hebben oft doen brenghen: Oft by ghebreke van
dyen / sullen vallen inde pene van dobbel breucke t'appliceren
als boven.
Item dat oock aengaende die lichtinghe vanden
voorsz rechte ende Impost / ende tot verhoedinghe van
alle fraude / sal d'instructie ende maniere van doen tot
hier toe gheploghen inde betalinghe vanden Impost
vanden bieren ghelijck die in Brabant zijn verpacht
gheweest / ende noch tegenwoordelick verpacht worden /
geachtervolcht worden / Alles op de pene van by
den voorsz Brouwers ende Indoenders respectivelick
frauderende / verswygende oft verstekende t'voorsz ongelt /
te verbeuren de weerde vanden voorsz bieren / ende
noch evenwel te betalen t'voorsz ongelt / te bekeeren
ende te deylen de voorsz pene als voore.
Ende sullen de particuliere Collecteurs ghehouden
zijn alle maendt over te brenghen de penninghen die
sy vanden voorsz Impost ontfanghen hebben / in handen
vanden ghecommitteerden Ontfangher vanden
voorsz ongelde vanden selven quartiere / te weten in
den quartiere van Antwerpen in handen van Coenraert
de Brier: Ende int quartier van Brussele in handen
van ... overbrenghende met
eenen certificatie by den Greffier oft Secretaris vander
plaetsen onderteeckent / vande menichte vande
amen oft tonnen biers die men heeft inne geleydt onder
het begrijp van sijne commissie / met goede verclaringhe
vande persoonen ende daghen / midts nemende
quitantie vanden voorseyden generalen Ontfangher
tot henlieder ontlastinghe.
Item daer t'voorsz recht vanden Impost sal verpacht
worden voor den tijt van ... maenden / die innegaen
sullen den ... van dese loopende maendt
van ... sullen de Pachters ghehouden wesen
de penninghen van heure pachtinghe op hen perijckel
te beuren / ende te brenghen in handen vanden
voorseyden ghecommitteerden Ontfanger alle maenden
een derdedeel van heuren pacht.
Dat die voorsz Pachters vanden voorsz ongelde
hun oock sullen moeten reguleren nae de Ordonnantie /
Instructie ende conditien / ghemaeckt op de verpachtinghe
ende collectatie vande generale Imposten.
Aldus gheadviseert ende ghesloten binnen Antwerpen
by den Staten van Brabant den XVI. September
vijfthien hondert tweentachtentich. Ende was
onderteeckent / My teghenwoordich ende ten bevele
vanden voorseyden Raedt.
Meganc.