Placcaet ende Ordi-
nantie Onss heeren des Conincx / gemaeckt
opt stuck vander Collectatie / van eenen hondersten
penninck / vande roerende ende onroerende goeden /
geaccordeert byde Staten van herwertsovere.
Met Privilegie der Co. Maiesteyt.
Gheprint inde Princelijcke Stadt van Bruesse-
le / by my Michiel van Hamont / gezworen
Drucker der Co. Maiesteyt.
Anno. M.D.LXXVI.
ONsen Meyer van Loven /
Amptman van Bruesselle / Schouteth
van Antwerpen / ende vanden
Bossche / ende alle andere onse ende onsen
Vassallen ende Smaelreheeren /
Officieren ende heure Stedehouders
saluyt. Alzoo de Staten van onsen
landen van herwertsovere tot Bruessele /
by heure gedeputeerde vergadert
wesende / hadden aenmerckt ende mitter daet bevonden /
dat die Spaensche soldaten ende heure aenhanghers /
rebelle ende vyanden van ons / als Prince ende Heere
vande selve Nederlanden / ende vande selve Landen ende
ingesetenen van dien / anders nyet en hadden voir hen
genomen / ende mitter daet bethoont / dan alderhande acten
oft wercken van gezworen hostiliteyten / wreetheyden
ende tyrannyen de selve goede ondersaeten aen te doene.
Soo int opmaecken van stercten / bolwercken / afbranden
vande goede ondersaten goeden / int stelen / rooven /
moorden / kelen / dootschieten / ende andere omminschelijcke
manieren van tleven te nemene vande vrouwen /
kinderen / ende manspersoonen / als int bedwanck van leveringe
van eetwerck ende dranck / mit oyck van gereeden
ghelde / brantschattinge / overloopinghe ende inneminge
van steden / vrijheden ende dorpen / verbrandinghe van
dien / ende besettinge respective vande selve / in alderhande
afgrijselijcke dreygementen mit andere verscheyde onsprekelijcke
ende omminschelijcke maniere van strafficheyt /
gewalt ende wille den voirsz. goeden ondersaten
bewesen / sulcx dat die selve Staten hadden die wapenen
mit voirgaende consent ende advijse van onse lieve ende
getrouwe die luyden van onsen Rade van State. By
ons gecommitteert totten gouvernemente generael van
onse voirsz. Nederlanden / moeten aennemen ende vueren
tegen de selve rebellen ende gezworen vyanden. Ende dat
om de selve ondersaten van sulckdanige voirdere overdaden /
gewalt / ende onverdraegelijcke moetwillicheyden
te moghen verhoeden / hadden onder andere middelen
om ghelt totte costen van donderhoudt vanden volcke
van oirloghe te vindene geconsenteert gehadt / in ende
over alle ende elcke vande selve onse Nederlanden / eenen
hondersten penninck / van alle ruerende ende onruerende
goeden daerinne geleghen / opten voet / oude cohieren /
carthabellen oft extracten vuyte cohiere / ordinancien /
instructien / ende sulcx als den iersten hondersten penninck
vanden onruerende goeden / is gecollecteert ende heeft vuytgebrocht /
inden Jaere XV.neghen ende tzestich. Ende vanden
voirsz. roerende goeden / opten voet / ende als inden
iersten termijn vanden halven Jaere naestcomende /
sullen bevonden worden / ghelicht ende opgebrocht te
wordene alle Maenden een sestendeel van Maende te
Maende / den tijt van een half iaer lanck / op gereede
ende heerlijcke executie. Om alle de penningen ende proffyten
daeraff comende geemploieert ende bestreckt te wordene totte
nootelijcke ende vuyterste beschermenisse vande voirsz.
onse vaderlijcke landen / ende wederstaen van alle rebelle
ende vyanden vande selve. Jnden verstande dat daerinne
oft dien aengaende niemant en sal bevrijt worden / geestelijck
oft weerlijck / binnen oft buyten slandts geseten /
geprivilegieert oft niet geprivilegieert / onse Raeden ter
zijden van ons / oft ter zijden van onsen Gouverneur
generael wesende / oft deel vanden lichaeme van ons nae
recht geacht domesticque / familieren / gerekende par les
Escroys, oft andere wye / oft hoe hooghe / oft groote auctoriteyt
oft staet hy hebbe / oft wat goeden / leengoeden
oft andere hy soude moghen hebben / twaer datse in ordinarise
oft extraordinarise beden waeren bevrijt geweest
oft nyet / dat die fraulden van openbaer verswijch van
overbringen vanden voirsz. onroerende goeden / gebeurt
inden voirsz. iersten hondersten penninck. Sullen inden
lesten termijn mogen ende behooren ontdeckt te wordene /
ende de merckelijcke suppletien / tot proffyte vander generaliteyt
ontfangen. Dat alle huerlingen van huysingen ende
pachters van gronden / van erfven / soo inde belotene
steden als daer buyten / ten platten lande / sullen een zestendeel
vanden voirsz. hondersten penninck tot heuren
laste moeten dragen / dat oyck van huysen affgebrant / zedert
den voirsz. iersten hondersten penninck / egheenen hondersten
penninck en sal betaelt oft ghelicht worden. Ende
vanden plaetsen / soo van steden / vrijheden als dorpen / die
vuytgeteert ende verschat zijn geweest / soo vande garnisoenen
als vande voirsz. rebelle ende vyanden. Sal inde
drye leste termijnen sulcke quijtscheldinghe / moderatie
ende verlichtinge gedaen ende gemaect worden / gelijck die
gedeputeerde vanden voirsz. Staten sullen bevinden te
behoirene. Ende dat de saecke van reel opbringinge vanden
voirsz. penninck egheen langer oft voirder vuystel / oft
merringe toe en laete / soo verre men de salicheyt ende welvaren
vanden voirsz. gemeynen lande begeert voir oogen
te hebbene ende te voirderen / met oyck alle aenstaende inconvenienten /
iae aensiende gantsche bederffeniste vande
selve landen / voir te commene als wel betaempt ende behoirt /
Gelijckerwijs / dat dit al ons by onse drye Staten /
ons Landts ende Hertochdoms van Brabant / is
verthoont ende te kennen gegeven geweest. Versocht hebbende
(om van heurent weghen t'voirsz. middel van opbringinge
van ghelde te voirderen / ende om in egheenen
gebreke te wesene / te voldoene / tgene dwelck tot onder
houdt ende bewaernisse vande selve landen soude nootlijck
wesen) Hen hierop versien te worden van onse behoirlijcke
ende gewoonlijcke brieven van Placcaten daer toe
dienende. SOE EEST. Dat wy ons hierinne willende
quijten tot meerder bewaernisse van onsen voirsz.
lande / ende goede ingesetenen vanden selven / ende eenenyegelijck
van u / ontbieden ende bevelen daer toe committerende
by desen / Dat ghy van stonden aene desen gesien /
de selve alomme onder den bedrijve van uwen ampte
ende officie / daermen gewoonlick is vuytroepinge ende publicatie
te doene / Van onsen twegen vuytroept ende publiceert /
oft doet publiceren ende vuytroepen / seer scherpelijck
ende expresselijck / bevelende eenen yegelijcken / wy ende van
wat conditie hy zy / niemant vuytgesundert / hen te vuegen
ende reguleren naevolgende tvoirsz. consent / den
Cohieren vanden voirsz. iersten hondersten penninck /
cartabellen oft extracten / vuyte selve cohieren getrocken /
ordonnancien ende instructien / alsdoen dien aengaende
gemaect ende vercondicht. Behalven aengaede de differenten
te rysene / ter saecken vanden voirsz. hondersten penninck /
nae het namptissement / die sullen voir de naeste
vande vier Hooftsteden / ten coste van ongelijcke bekint
ende bellicht worden / volgende doude bezworene rechten
ende hercommen Van Brabant. Ende specialicken bevelende
den Rentmeesters vande beden van onsen voirsz. lande
van Brabant / van wegen onsen voirsz. drye Staten. Ende
daertoe de taxateurs / gedeputeerde / collecteurs particulier /
ende alle andere / in ende totter lichtinge vanden
voirsz. iersten hondersten penninck te wercke gestelt geweest
hebbende / ende andere zoo verre des noot zy / die
in de lichtinghe van desen hondersten penninck / byde
voirsz. onse Staten / sullen nootelijck bevonden worden
gestelt te moeten wesen. Ende sulcx anderssins hem eenyegelijcke
te emploierene / die daer toe behoeffelijck ende
nootelijck is / als behoirt totter volcommen executie toe /
sonder des by yemanden in gebreke te zijne. Opte pene
van alle costen ende schaden / daerby aencommende op hen
ende op heure goeden te verhalene / hebbende tot meerder
versekerheyt / alle de selve persoonen die hen in tgene des
voirsz. is / sullen emploieren ende moeten te wercke gestelt
worden / genomen in onse Sauvegarde ende hoede. Om
jegen alle overdaet ende iniurien beschut en beschermt te
wordene. Verbiedende eenenyegelijck wye hy zy / den
selven gecommitteerden yet te misdoene oft te messeggene /
mit woorden oft met wercken / op pene van infractie
der voirsz. Sauvegarde. Ontbiedende ende bevelende /
voirts u luyden ende alle andere Justicieren ende
Officieren voirsz. ende voirts allen anderen dien dit aengaen
sal mogen / dat zy hen naevolgende desen reguleren /
ende dat doen ende laten effectueren by dafnemen vander
penen / inde voirsz. Ordonnantien ende Instructien
vanden voirsz. iersten hondersten penninck begrepen.
Sonder verdrach oft dissimulatie. Ende daer toe wy u
ende hen / geven volcommen macht ende sunderling bevel by
desen / Want ons alsoo gelieft. Gegeven in onser voirsz.
Stadt van Bruessele / onder onsen Contresegel hierop
gedruct in placcate. Den eenentwintichsten dach van
Novembri. Jnt Jaer Duysent Vijfhondert ende zessentzeventich.
Byden Conninck /
In zijnen Raede.
Boudewijns.