Placcaet ende Ordi-
antie Onss heeren des Conincx / gemaect tegen die Buy-
telanders / ende Bastaerden / besittende eenige Officien in
Brabant: Ende tegen die ghene die Officien van Ju-
sticien in pachte / pantschap / oft beleeninghe binnen
den selven Lande van Brabant zijn hebbende.
Met Privilegie der Con. Meyt.
Gheprent inde Princelijcke Stadt van Bruessele /
by Michiel van Hamont / gezwozen Drucker der Co.
Maiesteyt. Anno. M.D.LXXVI.
ONsen Meyer van Loeven / Amptman
van Bruessele / Schoutetten van Antwerpen
ende vanden Bossche / ende allen anderen onsen
Officieren ende dien van onsen Vassallen ende
smaelreheeren van onsen lande van Brabant / mitgaders
allen onsen Officiers ende dien van onse Vassallen van onsen
lande van Overmase, dien dit aengaen sal / ende huere stadthouders
saluyt. ALSOE de drye Staten van onsen voirs.
lande ende Hertochdomme van Brabant ons hebben doen verthoonen:
Dat hoewel wylen hoochloffelijcker gedachten
den Keyser Kaerle de vijffste des naems / onse lieve heere ende
Vader (wiens ziele God genadich zy) by zijne opene brieven
van Placcate in date vanden X-en dach van Decembri /
int jaer XV. negenenveertich hadde doen publiceren / dat
alle Vremdelingen ende vuytlanders ende in onsen voirsz. lande
van Brabant nyet geboren zijnde hebbende oft bedienende
inden selven onsen lande eenige Officie tegens den
XXXVII-te XXXVIII-te ende leste artijckelen vande Blyde Incompste
van Brabant / van huere Officien gedestitueert souden worden:
Ende dat wy achtervolgende de voirsz. Blyde Incompste
by ons geconfirmeert ende den voirsz. drye Staten beszworen /
tselfde oick hadden doen publiceren by andere onse
Briefven van Placcate / in date vanden IX-ten van Junio XV-e.
zevenenvijfftich, mit expresse declaratie van nulliteyt van alle
Acten / Citatien / Exploicten ende Procedueren / die de voirsz.
vremdelingen ende vuytlanders ende geen Brabanders wesende
souden doen. Dat wy oick den XI-en dach van Julio / int
jaer XVc. achtenvijfftich den voirsz drye Staten geaccordeert
hadden zekere Acte / Daer by volgende het XIX-te article
van onse voirsz. Blyde Incompste wy vercleert hadden /
dat alle Raden / Drossaten / Justiciers / Rechters / oft hebbende
officie in Brabant / nyet wesende van wettigen bedde /
hen van huere Staten oft Officien verdragen souden /
Ende dat wy als doen de selve daervan verdrongen ende destitueerden.
Al waert oick soe / dat die by ons / oft onse voirsaten
gelegittimeert / gehabiliteert / ende tot eenigen Staten
oft Officien ontfangen waren: Dat boven dien volgende
het X-e. article van onse voirsz. Blyde Incompste / onsen Cancellier
ende die van onsen Rade / Secretarisen / die vande Rekencamer
in Brabant / Greffiers / Drossaten / Warantmeester /
Woutmeester / ende alle andere die eenige groote Staten oft
Officien hielden / mitgaders oick alle Officiers vanden platten
lande / Ende oick die Burgemeesters ende Scepenen van
onse Steden / ende alle andere die van onse oft onser Vasallen
wegen / Recht / Wet ende Justicie administreren / Souden
zweeren op het heylich Evangelium / Dat zy onse Blyde Incompste
in alle huere puncten souden onderhouden / voir soe
vele de selve elcken van hen aengaen mochte: Daerenboven
dat wy oick ten versuecke vande voirsz. Staten op den
voirs. IX-ten. dach van Junio XVc. zevenenvijftich zeker Placcaet
geaccordeert hadden / daer by wy hadden doen publiceren /
dat nyemant van wat State / oft conditie hy ware
inden voirsz. lande van Brabant / soude mogen houden oft
bedienen eenige Staten oft Officien van justicie / in pachte /
pantscap oft beleeninge: Op pene van nulliteyt volgende
die XXIII-e ende leste articulen vander selver Blyder Incompste:
Ende voirts dat wy alnoch by andere onse briefven van
Placcate / in date vanden XV-en. van Septembri XVc. eenentzestich /
hadden doen publiceren, dat alle persoenen houdende
eenige Officien in Brabant / tware van ons / onse
Steden / Vasallen nyet geboren zijnde vanden voirs. lande
van Brabant / mitgaders de ghene nyet geprocreert
zijnde in wettigen bedde / ende oick de ghene die huere staten
van Justicie in pachte / pantschap oft beleeninge genomen
hadden / hen terstont ende zonder voirder vertreck verdragen
souden / van dexercitie ende bedienen van huere voirs.
staten ende officien: Gelijck wy oick de selve daervan destitueerden
ende verdrongen by tvoirsz. Placcaet / nyetjegenstaende
dat de voirs. persoenen / by ons oft onse voirs. voirsaten
gelegittimeert / gehabiliteert / ende tot eenige Staten
oft officien ontfangen waeren / Dat oick alle Officiers /
zoe wel van ons als van onse Vasallen van Brabant voirseyt /
die den eedt begrepen int X-e articule van onse voirsz.
blyde Incompste nyet gedaen ende hadden / gehouden souden
wesen den selven eedt te doene: Te wetene die principale
Officiers vanden voirs. lande / als Drossaet van Brabant /
Provoest / Warantmeester / Woutmeester / ende Bailiu van walsch
Brabant / Meyer van Loeven / Amptman van Bruessele,
Schoutetten van Antwerpen ende vanden Bossche / binnen
eenre maent naede publicatie / in handen van onsen lieven
ende getrouwen Ridder ende Cancellier van Brabant Heeren
Janne Scheyffve / Doctoer in beyden Rechten / Heere van
S. Achten Rode etc. Ende die andere Officiers ende eenige
staten bedienende / den voirsz. eedt respectivelijck te doen ter
eerster vierschare oft dinghdach / die naede voirs. publicatie
gehouden soude wesen / in handen vanden oudsten Leenman
/ Scepenen oft anderen Rechter vander plaetsen daer
hy Officier is / de selve daertoe respectivelijck geauctoriseert
hebbende: Ende de ghene van hen / die ter selver vierschare
oft dinghdach absent souden wesen / ende den voirsz.
eedt nyet ende souden gedaen hebben / gehouden souden wesen
den selven te doen ter eerster vierschare oft dinghdach
daernae volgende dat zy in rechte sitten souden. Ordinerende
ende bevelende allen onsen Vassallen ende Smaelreheeren /
hebbende in hueren dienst eenige vremdelingen /
vuytlanders / ende andere bedienende staten oft officien tegens
onse voirsz. blyde Incompste / Deselve daervan te
verdragen ende effeituelijcken te destitueren / Stellende in
huere plaetsen andere nutte ende gequalificeerde persoenen /
zonder des in gebreke te zijne op diversche penen ende boeten
te verbueren byden ghenen die ter contrarien gedaen
souden hebben / mit oick scerp bevel aenden Procureur generael /
tvoirs. leste Placcaet onverbrekelijcken te doen onderhouden
ende observeren / zonder gunste / verdrach oft dissimulatie:
Dat nochtans al tselve nyetjegenstaende onse
voirseyde blyde Incompste in tgene des voirseyt is / nyet
zoewel onderhouden ende geobserveert ende is alst behoirt.
WAEROMME / Wy de zaken voirscreven overgemerct /
Genegen wesende ter bede ende begheerte vande
voirs. Staten / ende op dat onse voirs. blyde Incompste des
te beter onderhouden ende geobserveert mach worden. U
ontbieden ende bevelen / daertoe committerende by desen / dat
ghy terstont ende zonder voirder vertreck / kundicht ende publiceert /
alomme binnen de plaetsen ende limiten van uwe
voirs. jurisdictie ende officie / daermen gewoenlijck is vuytroepingen
ende publicatien te doene / van onsen wegen zeer
scerpelijck bevelende / dat alle persoenen houdende eenige
Officien in Brabant / tzy van ons / onse steden / Vassallen
oft smaelreheeren / nyet geboren zijnde van onsen voirsz.
lande van Brabant / mitgaders de ghene nyet geprocreert
zijnde in wettigen bedde: Ende oick de ghene die huere officien
van Justicie in pachte oft pantschap oft beleeningen
genomen hebben / terstont ende zonder voirdere vertreck
hen verdragen van dexercitie ende bedienen van huere voirs.
staten ende officien / gelijck wy oick de selve daervan verdragen
ende gedestitueert hebben zoe voirs. is / Al waert oick
soe / dat de voirs. persoenen by ons oft onse voirsaten geligittimeert /
gehabiliteert / ende tot eenigen staten oft officien
ontfangen waren. Dat oick alle Officiers / zoewel
van ons / als van onsen Vasallen ende smaelreheeren van
onsen voirs. lande / Die den eedt begrepen int voirsz. X-e
article van onse blyde Incompste nyet gedaen en hebben /
gehouden worden den selven eedt te doen / Te weten die
principale Officiers van onsen voirsz. lande / als onsen
Drossaet van Brabant / Provoest / Warantmeester / Woutmeester
ende Bailiu van walsch Brabant / Meyer van Loeven
/ Amptman van Bruessele / Schoutetten van Antwerpen
ende vanden Bossche / binnen eenre maent naede publicatie
van desen / in handen van onsen voirgenoemden Cancellier
van Brabant / ende die andere Officiers / oft bedienende
eenigen staet / den voirs. eedt respectivelijck te doen ter
eerster vierschare oft dinghdach / diemen houden sal naede
voirs. publicatie / in handen vanden oudtsten Leenman /
Scepenen oft andere Rechter vande plaetsen daer hy Officier
is / de selve daertoe respectivelijck auctoriserende / van
welcken Leenman / Scepenen oft andere Rechters hy gelijcken
eedt affnemen sal / ende deghene van hen die tot sulcker
vierschare oft dinghdach absent sullen wesen / ende den
voirs. eedt niet gedaen en sullen hebben / sullen gehouden
wesen den selven eedt te doen ter eerster vierschare oft
dinghdach daernae volgende / dat zy in Rechte sitten
sullen. Ordinerende ende bevelende voirts onsen Vassallen
ende Smaelreheeren onss voirseyden landts van
Brabant / die in hueren dienst hebben eenige vremdelingen /
vuytlanders / oft andere bedienende officien oft diensthebbende /
tegens onse voirs. blyde Incompste / dat zy de selve
terstont verdragen ende effectuelijcken affstellen ende destitueren /
Stellende in huere plaetsen andere bequame gequalificeerde
persoenen / zonder des in gebreke te wesen /
Ende zoe verre datter eenige zwaricheyt viele / aengaende
die voirs. Officiers / te weten oft huere officien souden wesen
officien van justicien oft nyet. Willen ende ordineren
wy / dat in sulcken gevalle de selve swaricheyt gevuyt /
gedetermineert sal worden by onsen voirnoemden Cancellier
ende luyden van onsen voirsz. Rade in Brabant: Al
tgene hier boven gescreven is geordineert ende vercleert op
de voirs. penen / ende de ghene begrepen in onse voirs. blyde
Incompste / ende daerenboven te verbueren de somme van
Hondert gouden Croonen / byden ghenen die ter contrarien
gedaen souden hebben. Ontbieden ende bevelen u daeromme /
mitgaders onsen Procureur generael van Brabant /
ende allen anderen onsen Rechteren / Justicieren / ende
Officieren / ende die van onse Vassallen ende Smaelreheeren /
huere stedehouders / ende elcken van hen besundere zoe hem
toebehoiren sal sorchvuldich toesicht te nemen / Dat dese
onse jegenwoirdige Ordinantie / Gebodt ende verbodt nyet
overtreden en worde / maer dat de selve in allen hueren
puncten ende articulen onverbreckelijcken onderhouden ende geobserveert
worden / zonder gunste / verdrach oft dissimulatie
voir soe vele als zy de indignatie beduchten.
Want ons alsoe gelieft. Gegeven in onser Stadt van
Bruessele / Onder onsen Contresegel hierop gedruct in
Placcate / den XXVI-en. dach van Martio XVc. zessentzeventich.
Byden Coninck.
D'overloepe.
Met Privilegie der Con. Majesteyt / by sekere Acte der selver Con. Maiest. daer toe verleent.
Onderteeckent Jac. Blijleven.