Kennelijck zij eenen ijegelijcken dat voir ons schepenen
ondergeschreven inne propre persoone is gecomen ende gecompareert d'eersame
Willem Janssoon Vermeer gesont van lichame gaende staende ende sijne memorie
metten verstande wel volcomen ende machtich die welcke heeft voir sijnen
testamente gemaeckt ende geordonneert tgene ... ende alsoo hiernaerbeschreven is
volgende dats te weten dat alle sijne goeden tware haeffelijck off erffelijcke
gereede penningen ende voirts alle sijne goeden hoedanich die mogen wesen
naer sijnre testateurs doodt aenveert ende behouden sullen worden bij Goijardden
sijne naersoone nochtans alsoo dat hij Goijart dese goeden nijeten sal
mogen minderen off aenveerden naer alleenlijck daeraff prouffiteren, ende
genieten ... off jaerlijx incomen ende vorderen of andersints nijet, ende
naer doode de voirschreven Goijarts sullen alle dese goeden devolveren ende
aencomen op Dingna sijn testateurs voirdochter welcke goeden Cornelis Michiel
Janssoon met derselver Dingna oock nijet sal mogen aenveerden minderen of
bewaren maer soo lange Dingna sijne huijsvrouwe leven sal daeraff maer sal
genieten, de tocht, ende naer doode der voirschreven Dingna sullen dese goeden
in der erffelijckheijt gemaect gedeijlt ende geparteert wordden op der kijnderen
Cornelis ende Dingna voirschreven, welcke kijnderen dese goeden nijet sullen
mogen ..., maer ... sullen laten tertijt ende wijlen het jonghste kijnt twintich
jaren oudt wesen sal, omme sijn brodt alsoo eerlijcken aldan cunnen gewinnen
welcke jongste kijnt hij testateur wil dat met d'incomen deser goeden tot dijen
tijde sal worden opgebracht: Hierop maeckt hij testateur Jenneken natuurlijcke
dochter wijlen Jans sijn soone de somme van vijffentwintich carolus guldens eens
vuijtten gereetsten goeden sijn testateurs naer sijnre affllijvicheijt terstont
vuijtgereijckt te worden ... dat dese xxv gulden der voirschreven Jenneken
sullen volgen sonder ijmants tegenseggen, soo hij testateur vuijt ... aelmisse
haer dese somme is gunnende: Alle welcke poincten ende articelen hij testateur
wilt ende begeert dat bij eenen ijegelijcken dijen dat aengaet naergegaen
ende onderhouden sullen worden sonder dat ijmant hen daertegens sal
opponeren in eeniger manieren, sonder argelist dach x novembris 1622 scabini
Baerdwijck et Brock.