Willem, Cornelis, Niclaes ende Jan gebroederen soonen
wijlen Hendrick Cornelissoon de Crom voor hen selven ende deselve alnoch
vuijtten name ende als procuratie hebbende van Hendrick Gerits als man ende
momboir Anna sijnre huijsvrouwe oock dochtere wijlen Hendrix voirschreven voir
den welcken deselve instonden ende gelooffden mits desen, alle al sulcke
haeffelijcke goeden daervuijt wijlen Hendrick hennen vader is verstorven ende
tegenwoordichlijcken bij Willemken dochtere wijlen Willems van Eijck henne
moeder beseten sijn egeene der selven daeraff vuijtgescheijden Alsoo zij seijden
hebben zij wettelijck ende erffelijck overgegeven ende opgedragen derselver
Willemken dochtere Willems van Eijck voirschreven met affgaen ende vertijen
alsdat gewoonlijck ende recht is gelovende op hen selven ende op alle henne
goeden hebbende ende vercrijgende dit vertijen overgeven ende affgaen altijt
vast ende stentich te houden ende in hennen name te doen houden sonder ennich
wederseggen ende alle commer of calangie daerop comende altemael aff te
doen derselver des sal deselve Willemken alle wettige schulden naar doode van
Hendricken haren man ombetaelt staende voldoen ende betalen sonder last van hare
kijnderen alsoo dat deselve daeraff nijet en sullen wordden gemolesteert of
gemaent in eeniger manieren: daertegens deselve Willemken oock wederomme trecken
ende genieten sal alle prouffijtelijcke schulden ... haer met hare kijnderen ten
achteren is daeroppe oock ten behoeve vande selve Willemken renuntierende in
maniere als voor mitsdesen scabini Bardwijck et Graeff datum xxvi aprilis
1616.
Is geaccordeert ingevalle dat Willemken haer
wederomme tot houwelijcke quame dat in alsulcken gevalle dit contract sal
cesseren.