Jan soone Cornelis Adriaen Somers daer moeder aff
was Margriete dochtere wijlen Peeter Jan Adriaenssoon voor sijn selven, Adriaen
soone Geridt Huijbert Danielssoon als man ende momboir Marie sijnre huijsvrouwe
dochtere Cornelis ende Margriete voirschreven oock voir sijn selven, Peeter
soone Willem Hendrick Smolders vuijt name ende als procuratie hebbende van
Peeteren ende Bernarden gebroederen soonen Cornelis ende Margriete voirgenoemd,
sijnde deselver procuratie voir schepenen deser Heerlijckheijt ..., ende ons
schepenen ondergeschreven oock gebleecken, in date den xxx maert 1611, ende
deselve Peeter als toesiender alnoch met Adriaenen soone wijlen Adriaen Somers
als momboir metten heere geordonneert over Adriaenen ende Cornelisen gebroederen
onmondige kijnderen Cornelis ende Margriete voirschreven ende Geeridt soone
wijlen Jan Adriaen Zegers ende Jan soone Jacob Jan Sijmons sijnde metten heere
geordonneerde momboir ende toesiender over Adriaenen ende Anna broeder ende
sustere kijnderen wijlen Marten Dirck Martens welcke kijnderen deselve Marten
vuijt Margriete dochtere Cornelis ende Margriete ... in haren iersten houwelijck
... verweckt ende vercregen hadde ende deselve Geridt alnoch ende Jacob als
metten heere geordonnerde momboir ende toesiender over Marie onmondige dochter
wijlen Niclaes Adriaenssen bij de selve Niclaes ende vuijt Margriete dochtere
Cornelis ende wijlen Margriete voirschreven in haren tweede houwelijcke verweckt
ende vercregen hadde ende voir welcke onmondige de voirschreven momboir ende
toesiender respective hen sterck maeckten ende gelooffden: de hellicht in
ombedeijlt in een stuck beemde eertijts vander gemeijnte innegenomen tot heije
weije ende beemdt liggende daeraff dander hellicht Adriaen Geridt Peeter Maes
Sgenen is toebehoirende den geheelen beemdt sesthien lopensaet of daeromtrent
begrijpende nochtans alsoo groodt ende cleijn, als tselve gelegen is binnen der
parochie van Tilborch ter plaetschen geheijten teijnden den Langendijck, voor
d'Oude Tilborchs Broeck, aldaer tusschen erffenisse Denijs Hendrick Smolders
deen zijde, ende tusschen erffenisse Niclaes Hendrick Niclaes Voskens dander
zijde, streckende vanden dijck voir her voirschreven oudt Broeck liggende totter
gemeijnte van Tilborch ende Goirle: Alsoo zij seijden: hebben zij wettelijck
ende erffelijck vercocht overgegeven ende opgedragen Jannen soone wijlen Jan
Danielssoon van Beurden d'oude met affgaen etc. warandiam (te waren) ende dit
vercopen etc. ende alle commer etc. vuijfgenomen dat de copere des heeren
schauwe van dit stuck erffenisse eertijts geordonneert tonderhouden naer oude
gewoonte dach xxviii martij 1612 scabinij Brock et
Swagemaeckers.