Cont sij enijeghelijcke dat comen sijn voer ons scepenen
onderghescreven Peter zoen wilner (wijlen) Cornelis Zegers ter eenre ende
Cornelis zoen Gherits die Molder Jenneken ende Margriet sijn susters cum
tutoribus (met hun voogd) die welck Gherit voers vercregen hadde, bij Henricken
dochter wilner Cornelis Zegers voers ter anderen sijde ende hebben onder hen een
erffdeijllinge ende erffscheijdinge ghemaeckt ende ghedaen van
alsulcken goeden als hier nae ghescreven staen
Overmits welcke erffdeijllinge ende erffscheijdinghe wille
soo sal Peter voers hebben houwe ende erffelijcke besitten een stuck erffs tot
lant ende weijen liggende vii lopensaet vel circiter (of daar omtrent)
begrijpende gelegen inde parochie van Tilborch ter stede geheijten in die Teeten
Braeck tussen erffe Peter Peter Ghijben zoen deen sijde ende tussen erffe
Cornelis ende sijn suster voers dander sijde streckende vande erffe Robbrechts
van Malsen heer van Tilborch ende Goerl, totte ghemeijne strathen toe Item hier
toe drie ghedeelten in drie lopensaet beempts gelegen in de Heijninge tussen
erffe Adriaen Michiel Roeloffs zoen deen sijde ende tussen erffe Jan die Bont
cum alijs (met anderen) dander sijde Item hier toe die helft in twe lopensaet
heijvelts gelegen aen die Hasselt dwelck noch ombedeijlt is als sij seeden op
welck ghedeelt ende erffe voers Cornelis met sijn suster voers volcomelijcke op
vertegen hebben tot behoeff Peters voers daer Peter voers uit gelden ende
betalen sal aen Engel Beerthen thien lopen rogge erffpachs Item aen Joest Berijs
1/2 mud rogge erffpachs Item den heer van Tilborch omtrent 1 blanck chijns
jaerlics van recht hier toe uit te
vergelden
Item hier tegen sullen Cornelis met sijn susters voers
hebben houwe ende erffelijcke besitten een stuck erffs tot lant ende weijen
liggende vijff lopensaet vel circiter (of daar omtrent) begrijpende gelegen inde
parochie van Tilborch ter stede geheijten in die Teeten Braeck tussen erffe Jan
Adriaen Smolders zoen deen sijde ende deen eijnde ende tussen erffe Peters voers
dander sijde hoedende metten anderen eijnde aen die ghemeijne straet Item hier
toe een stuck lands ii 1/2 lopensaet vel circiter (of daar
omtrent) begrijpende gelegen in die Schijve tussen erffe Jan Peter Ghijben
zoen cum pueris (met zijn kinderen) deen sijde ende tussen erffe Peter Peter
Ghijben zoen dander sijde Item hier toe dat vierendeel in die drie lopensaet
beempts ut supra (als boven) Item hier toe die helft in die twe lopesaet
heijvelts ut supra als sij seden op welck ghedeelt emde erffe voers Peter
voers volcomelijcken op vertegen heeft tot behoef Cornelis ende sijn
susters voers, daer sij uit sullen gelden aen Peter Herman Heijsten zoen
twelff lopen rogge erfpachs Item die erfgenamen IJken Jacops tot Holten sess
lopen rogge erfpachs Item den heer van Tilborch 1/2 Oude Groten ende een hoen
chijns jaerlics van recht hier uit te vergelden et promiserunt (en hebben
beloofd) die een des anderen ut moris est (zoals gebruikelijk is) ende daer toe
verborgen commer malcanderen te helpen dragen etc Item in deese deijllinge is
voorwaert soe wanneer ijemant van sijne weege wil vercopen hen lant in die
Teeten Braeck, dan sullen die weege die sij nu ghemaeckt hebben, elck van sijne
sijde ... om gaen totten gront daer sij aen behoeren sonder argelist datum op
Sinte Huijbrechs dach Bisscop scabini Vermee, Berijs.