Cont sij enijegelijcken, dat comen is voer ons scepenen
onderghescreven Henrick Claus Wouters zoen alias van Gestel, ende heeft ghewilt
ende ghemaeckt ende draegt op Jacoppen sijnen wittigen zoen een stuck erffs tot
weijen liggende iii lopensaet vel circiter (of daar omtrent) begrijpende,
gelegen inde parochie van Tilborch ter stede geheijten aen die Cleijn Hasselt
omtrent die Steene Camer tussen erffe Robbrecht van Malsen heer tot Tilborch
ende Goerl deen sijde ende deen eijnde ende tussen erffe Jan Henrick zoen van
Gestel dander sijde, hoedende metten anderen eijnde voer aen die ghemeijn straet
als hij seede, vande voers Jacoppen dit stuck erffs voers ierst aen te veerden
naede doot van Henricken voers ende sijner huijsvrouwe, en dat te ghebruijcken
sijnen leven lanck duerende los ende vrij van allen allen commer, ende naede
doot van Jacoppen voers soe sal dit stuck erffs voers mede om gaen totten rechte
erffgenamen van Henricken ende sijner huijsvrouwe voers, behoudelijcken dies dat
die doode hant altijt mette levende deijlle sal sonder argelist datum xvii
october scabini Ael, Stevens anno xix.